Dje persona të panjohur kanë djegur flamurin e Kosovës në komunën e Zveçanit.
Pas kësaj situate, ka reaguar KFOR. Përmes një komunikate për media, KFOR ka njoftuar se tashmë gjendja në komunën e Zveçanit është stabilizuar.
“Njësitë e Batalionit të Forcave Rezervë Operacionale të misionit të KFOR-it të udhëhequr nga NATO nuk do të jenë më të pranishme në ndërtesën e komunës. Në vend të kësaj, ata do të qëndrojnë në zonë dhe do të kryejnë patrullime të rregullta për të siguruar një mjedis të sigurt për të gjithë njerëzit që jetojnë në komunën e Zveçanit”, thuhet në njoftimin e KFOR-it.
KFOR-i ka theksuar se vazhdon të ofrojë një mjedis të sigurt për të gjitha komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme.
Ndërkaq, policia e ka iniciuar rastin si “nxitje e urrejtjes, përçarjes dhe mosdurimit”
”Persona të dyshuar të panjohur kanë djegur një flamur. Njësitet policore kanë dalë në vendin e ngjarjes dhe janë duke hetuar rastin. Lidhur me rastin është informuar edhe prokurori”, thuhet në njoftimin e policisë.
